ក្រៅពីធ្វើការបំបៅទឹកដោះ ឬទឹកដោះគោឲ្យទារក លោកអ្នកក៏គួរបន្ថែមអាហារផ្សេងៗដល់កូនលោកអ្នក នៅពេលដែលគេមានអាយុចាប់ពី ៤ ឬ ៦ខែឡើងទៅ។ អាហារបន្ថែមដែលច...
ក្រៅពីធ្វើការបំបៅទឹកដោះ ឬទឹកដោះគោឲ្យទារក លោកអ្នកក៏គួរបន្ថែមអាហារផ្សេងៗដល់កូនលោកអ្នក នៅពេលដែលគេមានអាយុចាប់ពី ៤ ឬ ៦ខែឡើងទៅ។ អាហារបន្ថែមដែលចាំបាច់បំផុតនោះ គេនិយមហៅតៗគ្នាថា បបរកូនក្មេង។ វាមានលក្ខណៈងាយស្រួលក្នុងការចម្អិន និងចំណាយតិចបំផុត។ នៅក្នុងអត្ថបទនេះ យើងនឹងបង្ហាញអំពីបបរទារក សម្រាប់ការលូតលាស់ឆ្អឹងបានល្អ។ ខាងក្រោមនេះគឺជារូបមន្តក្នុងការចម្អិនបបរម្យ៉ាង ដែលអាចធ្វើឲ្យឆ្អឹងកូនលោកអ្នកលូតលាស់បានល្អ។ តើមានរបៀបចម្អិនដូចម្តេចខ្លះ?
គ្រឿងផ្សំ
- អង្ករចំនួន៨០ក្រាម
- ស្ពៃក្តោបចំនួន៤០ក្រាម
- ផ្លែប៉ោមចំនួន៤០ក្រាម
- ទឹកចំនួន៨០០មីលីលីត្រ
- នេះជាគ្រឿងផ្សំសម្រាប់មនុស្ស៤នាក់។
វិធីចម្អិន
- ដំបូងអ្នកត្រូវតែលាងអង្ករឲ្យស្អាត បន្ទាប់មកយកវាទៅត្រាំក្នុងទឹកចំនួនពី ៣០នាទីឡើងលើ។
- បន្ទាប់មកអ្នកត្រូវតែយកអង្កររួមជាមួយទឹកដែលត្រាំវា ទៅដាំជាមួយទឹកចំនួន ៨០០មីលីលីត្រឲ្យឆ្អិន។
- បន្ទាប់មកទៀតអ្នកអាចយកស្ពៃក្តោបនោះទៅលាងឲ្យស្អាត រួចយកវាទៅស្ងោរឲ្យរលួយ។
- ចំណែកឯផ្លែប៉ោមវិញ អ្នកអាចលាងឲ្យស្អាត រួចចិតជាដុំតូចៗ ហើយយកវាទៅត្រាំក្នុងទឹកអំបិលដើម្បីកុំឲ្យវាខ្មៅ។
- ចុងក្រោយអ្នកអាចយកបបរ ស្ពៃក្តោប និងផ្លែប៉ោមទៅកិនជាមួយគ្នា បន្ទាប់មកយកក្រណាត់ស្បៃដើម្បីត្រងកាកវាចេញជាការស្រេច។
